Өнөөдөр Эрүүл мэндийн салбарынхан байгаль дэлхийдээ “амьсгалах ногоон уушиг” суулгаж өгсөн сайхан өдөр боллоо. Тодруулбал, Эрүүл мэндийн яам болон харьяа 16 байгууллагын 300 гаруй алба хаагч Олон улсын еко цэцэрлэгт  хүрээлэнд гурван төрлийн мод тарьж суулгаллаа.

Энэ бол зүгээр нэг мод тарих биш — яг л эрүүл мэндийн салбарынхан хүний амь насыг аврахын тулд зүрхэнд нь амьдралын хэм өгч байгаатай адил. Мод тарих нь дэлхийн “зүрх”-ийг дахин цохилуулах шиг ач холбогдолтой үйлдэл юм. Байгаль эхийн зүрх нь ой мод, гол ус байдаг.

Энэ үеэр Эрүүл мэндийн сайд Т.Мөнхсайхан: “ Монгол Улсын Ерөнхийлөгч  2030 он гэхэд нэг тэрбум мод тарьж ургуулна  хэмээн зарлаж, орон даяар мод тарих хөдөлгөөн өрнүүлээд байгаа. Өнөөдөр бид мод тарьж ургуулах ажилд хувь нэмэр оруулснаар байгаль орчноо хайрлаж, уур амьсгалын өөрчлөлтийн нөлөөг багасгах, ой, усны нөөцийг нэмэх, экологийн тэнцвэрт байдлыг хангахад нөлөө үзүүлж байна гэсэн үг. Ингэснээр иргэд маань эрүүл аюулгүй орчинд эрүүл амьдрах нөхцөл бүрдэх юм. МОДЫГ СУУЛГААД ОРХИЛГҮЙ арчилж ургуулах үйл хэргийг үргэлжлүүлэн хийж байхыг нийт мод тарьж буй хүмүүст хандан уриалмаар байна. Эрүүл мэндийн салбарынхан энэхүү цэцэрлэгт хүрээлэнд төгөл байгуулах болно” хэмээн онцлов. 

Түүнчлэн 2030 он хүртэл нийт 1 тэрбум мод тарих зорилго тавин, 2025-2027 онд 570 сая, 2028-2030 онд 850 сая мод тарьж ургуулахаар төлөвлөж байгаа нь Монгол орны хувьд “ногоон хувьсгал” өрнөж буйг илтгэнэ. Одоогоор 84 сая модыг шууд болон дүйцүүлэн тарьсан нь суулгац, үрийн нөөц, мод үржүүлгийн газрын тоог 5-6 дахин нэмэгдүүлжээ.