2025 оны 10 дугаар сарын 13-ны өдөр, Эрүүл мэндийн яам, , Халдварт өвчин судлалын үндэсний төв, Эрүүл мэндийн хөгжлийн төв хамтран “Сүрьеэтэй тэмцэх, сэргийлэх, хянах арга хэмжээний төлөвлөгөө”-ний танилцуулах уулзалтыг үндэсний хэмжээнд зохион байгуулж байна.

Арга хэмжээний зорилго нь Дэлхий дахинд шинэ болон сэргэн тархаж буй халдварт өвчнүүд тулгамдсан асуудал хэвээр байгаагийн нэг сүрьеэгийн өвчлөлийг бууруулах, илрүүлэлт, оношилгоо, эмчилгээний чанарыг сайжруулах, эрсдэлт бүлгийн хүн амд хүрч ажиллах тогтолцоог бэхжүүлэхэд оршино. Монгол улс нь сүрьеэгийн дарамт өндөртэй 30 орны тоонд багтаж, жилд дунджаар 3000 гаруй сүрьеэгийн тохиолдол, 150-200 нас баралт бүртгэгдэж байна.

Танилцуулах уулзалтад УИХ-ын гишүүд, Эрүүл мэндийн яам, Дэлхийн эрүүл мэндийн байгууллага, НҮБ-ын Хүн амын сан,холбогдох яам, агентлаг, аймаг нийслэлийн засаг дарга, эрүүл мэндийн байгууллагын шийдвэр гаргах түвшний 300 гаруй хүн оролцож байгаа юм.

2025-2028 онд хэрэгжих “СҮРЬЕЭТЭЙ ТЭМЦЭХ, СЭРГИЙЛЭХ, ХЯНАХ АРГА ХЭМЖЭЭНИЙ ТӨЛӨВЛӨГӨӨ” нь өмнөх үндэсний хөтөлбөр арга хэмжээний төлөвлөгөөнөөс дараах онцлогтой.

• Эрүүл мэндийн тусламж үйлчилгээний анхан шатанд сүрьеэгийн оношилгоо, эмчилгээний чадавхыг нэмэгдүүлж, өргөжүүлнэ.
• Бүх шатны эрүүл мэндийн байгууллагад сүрьеэг заавал мэдээлэх тогтолцоог хөгжүүлнэ.
•  Сүрьеэгийн илрүүлэлт, оношилгоо, эмчилгээний хяналтад шинэ технологи нэвтрүүлнэ.
• Олон эмэнд тэсвэртэй сүрьеэгийн тандалт, өвчтөн төвтэй тусламж үйлчилгээний чанар, хүртээмжийг нэмэгдүүлэх, халдварын хяналт сэргийлэлтийг бэхжүүлнэ.
• Салбар дундын хамтын ажиллагааг сайжруулах, нийгмийн хамгаалал, халамж үйлчилгээнд бүрэн хамруулах, сүрьеэгээс улбаалсан ядуурал, зардлын дарамтыг арилгана.

Төлөвлөгөөг хэрэгжүүлснээр сүрьеэгийн өвчлөлийг эрт илрүүлэх, халдвар дамжих эрсдэлийг бууруулах, эмчилгээний хяналтыг сайжруулах, лабораторийн чадавхыг нэмэгдүүлэх зэрэг чиглэлд бодит ахиц гаргах зорилготой юм. Иймд энэ удаагийн дээд хэмжээний уулзалтаар сүрьеэгийн тусламж үйлчилгээнд хэрэгжүүлэх арга хэмжээний төлөвлөгөөг танилцуулах, хэрэгжүүлэх арга хэмжээний чиглэлийг өгөх, эрүүл мэндийн салбарын бүх түвшинд сүрьеэгийн илрүүлэлт, оношилгоо, эмчилгээг оновчтой байдлаар үзүүлэх талаар онцолж байна.

Эрүүл мэндийн хөгжлийн төвөөс сүрьеэгийн тандалт, хяналт, мэдээллийн тогтолцоог сайжруулах, эмч, мэргэжилтний чадавхыг бэхжүүлэх, шинэ технологи, арга зүйг нэвтрүүлэхэд дэмжлэг үзүүлэхээр ажиллах юм.