Сүрьеэтэй өвчтөн, түүний гэр бүлийг нийгмийн халамжийн үйлчилгээнд хамруулах, бодлого, удирдамжийг хэрэгжүүлэх чадавхыг сайжруулах зорилгоор Эрүүл мэндийн яам, ХӨСҮТ-тэй хамтран “Сүрьеэгийн хариу арга хэмжээг эрчимжүүлэх, нийгмийн халамж үйлчилгээг сайжруулах нь” сэдэвт сургалт зохион байгууллаа.

 

Шаардлагатай бүх хүнийг нийгмийн хамгааллын хөтөлбөрт хамруулбал сүрьеэгийн өвчлөл жилд 9 хувиар буурах тооцооллыг мэргэжилтнүүд хэлж байна.

 

Өрхийн аль нэг насанд хүрсэн хүн сүрьегээр өвчлөх нь хүүхдэд өвчлөх эрсдэл болон санхүүгийн дарамт учруулдаг болохыг олон улсын судлаачид дүгнэсэн байна.

 

ДЭМБ-аас Ази, Номхон далайн баруун бүсийн улс орнуудын дунд Монгол Улс сүрьеэгийн өвчлөл өндөртэй улсын тоонд орж байна. Иймд сүрьеэ өвчтэй зорилтот хэсэгт үзүүлэх нийгмийн халамж, хамгааллын үйлчилгээг сайжруулснаар өвчлөлийг бууруулахад тус дөхөм болох юм.

 

Сургалтад 21 аймаг, 9 дүүргийн ХХҮГ-ын хөгжлийн бэрхшээлтэй хүний асуудал хариуцсан халамжийн мэргэжилтэн, эрүүл мэндийн магадлалын зөвлөлийн албан хаагчид хамрагдлаа гэж Гэр бүл, хөдөлмөр, нийгмийн хамгааллын яамнаас мэдээллээ.